Psa 21 | TPI | STEP | Devit i raitim dispela song. Em i song bilong man i bosim musik. Bikpela, king i amamas long yu givim strong long em. Em i amamas moa yet long yu mekim em i winim pait.

Psalms 21

God i helpim king na king i litimapim nem bilong God

Devit i raitim dispela song. Em i song bilong man i bosim musik.

1 Bikpela, king i amamas
long yu givim strong
long em.
Em i amamas moa yet
long yu mekim em i winim pait.
2 Samting em i laik long kisim,
yu givim em pinis.
Na samting em i askim yu long en,
orait em tu yu givim long em.

3 Yu kam long em
na yu laik mekim gut tru long em.
Na yu putim hat king i gat gol
long het bilong em.
4 Em ^a i askim yu long givim em laip,
na yu givim em.
Na yu mekim laip bilong en
i stap longtaim tru.

5 Yu helpim em
na em i gat biknem moa yet.
Nem na strong bilong em
yu yet yu givim em.
6 Yu ^b save mekim gut tru long em,
na tru tumas, yu bai mekim olsem
inap oltaim oltaim.
Yu stap klostu long em,
na dispela i mekim em
i amamas tru.

7 God ^c Antap Tru,
king i bilip tru long yu.
Yu save marimari long king oltaim
olsem na bai em i sanap strong.
8 Bai king i holimpas
olgeta birua bilong em.
Na bai em yet i kalabusim
ol man i no laikim em.
9 Taim ^d em i kamap long ples klia
bai em i pinisim ol birua,
olsem bikpela paia
i kukim ol samting.

Tru tumas, bai God i kros na i daunim ol,
na bai paia i kukim ol olgeta.
10 Bai king i kilim i dai
olgeta pikinini bilong ol.
Na bai lain pikinini bilong ol
i no inap i stap moa long graun.

11 Ol ^e i tingting na pasim tok
long mekim nogut long em.
Tasol ol i no inap winim em.
12 Bai em i sutim spia bilong em
long ol
na mekim ol i ranawe.

13 God, kam wantaim strong bilong yu.
Na bai mipela i mekim song
bilong litimapim nem bilong yu.